TL seidauk iha klareza sai membru ASEAN

Sekretariu Estadu ba assuntu ASEAN, Roberto Soares fahe informasaun kona ba assuntu ASEAN nian iha kampus Institutu Superior Cristal, Balide, Dili Tersa (13/08). FOTO: TIMOREXPOSE

Timorexpose- Sekretariu Estadu ba assuntu ASEAN, Roberto Saores hateten, to’o ohin loron seidauk iha pontu ida ne’ebe klaru kona ba adezaun Timor-Leste ba membru ASEAN tanba prosesu adesaun ne’e rasik sei depende maka’as ba serbisu diplomasia rejional nomos vontade diak nasaun membru  ASEAN tomak hodi bele desidi.
Roberto Saores hateten, kona ba Time Line governu nian wainhira Timor-Leste tama ba ASEAN, nia rasik lakohi atu hato’o ba públiku tanba iha diplomasia rejional, ne’ebe iha fiar metin katak sedu ka tarde Timor-Leste sei konsege toma nia pozisaun ka hetan nia direitu hanesan mós membru ASEAN sira seluk.
“Atu tama ne’e, bainhira loos ita fo fila-fali ba fundadores no membru ASEAN sira tomak atu uja sira nia matenek (wisdom) atu desidi rasik ba ita kona ba ita nia prontidaun tama ba ASEAN ne’e,” nia hateten ba Jornalistas wainhira ba hala’o deziminasaun assuntu ASEAN ba estudante sira iha Institutu Superior Cristal, Balide, Dili Tersa (13/08).
Hodi kontinua dehan “Ita kontinua ita nia atividades atu reforsa liu tan ita nia uma laran atu nune’e ita hatudu ba ASEAN sira katak la’os deit ita mak ba tuku sira nia odamatan, maibe mós loron ida sira rasik mak sei mai tuku ita nia odamatan para atu lori ita sai membru ba ASEAN nian.”
Nia hatutan, durante ne’e mós sekretariu estadu assuntu ASEAN hala’o ona liña koordenasaun interministerial hodi fo esplikasaun klean kona ba assuntu ASEAN nian.
Entretantu diretor ejekutivu Fundasaun Cristal, Agustinho Goncalves hateten, Fundasaun Cristal firme tebes atu produz Rekursu humanu ne’ebe bele compete iha area hotu, tanba nasaun membru ASEAN sira nia ema mós sei mai serbisu iha Timor-Leste no Timor oan sira mós bele ba serbisu iha sira nia rain.
“Maibe, ida ne’e ita mak tenke preparadu hodi labele lakon oportunidade ho sira,”  Agustinho Goncalves esplika. (sba)